Allt og ekkert

Gísli Sigurðsson

Ég heiti Gísli Sigurðsson og er fæddur í Keflavík á annan jóladag á því herrans ári 1953. Ég á 5 systkini: Hallmann fæddur 1945, Margrét fædd 1947, Ráðhildur fædd 1951 Sigurlaug fædd 1958 og loks Sigurður fæddur 1962.  Foreldrar okkar voru Sigurður Gíslason bifvélavirki fæddur 1911, látinn 2006 og Sigurlaug Anna Hallmannsdóttir fædd 1925, látin 2003. Við hlutum gott uppeldi verð ég að segja og komum vel undirbúin út í lífið úr foreldrahúsum. Ég varð fyrir því í æsku að smitast af berklum og dvaldi af þeim sökum á sjúkrahúsi um 3ja mánaða skeið rétt tæplega 4 ára gamall. Það er svo ótrúlegt að þessi sjúkrahúsdvöl mín er mér svo sterk í minni að ég get rifjað upp margt sem þar gerðist. T.d. var þarna yfirhjúkrunarkona sem hét Elísabet og tók miklu ástfóstri við mig. Þó sjúkrahúsið í Keflavík hafi ekki verið stórt á þeim tíma þá hafði hún engu að síður herbergi inni í byggingunni og þar var hún með þennan flotta grammófón og þar spilaði hún stundum plötur fyrir mig. En þá að öðru, ég lærði bakaraiðn í Ragnarsbakaríi í Keflavík og starfaði þar frá 1970  til ársins 1981 að ég keypti bakarí á Hellu og rak það ásamt konu minni Árnýju Dalrósu Njálsdóttur til ársins 1991. En við Árný giftumst árið 1975 og eignuðumst 4 syni: Njáll Trausti fæddur 3. ágúst 1976, Sigurður fæddur 6. janúar 1979 látinn 15. apríl 2006, Gísli Árni fæddur 4. júlí 1985 og Jóhann fæddur 29. apríl 1991. Að Helluárum okkar loknum fluttum við aftur til Keflavíkur og störfuðum við við hin ýmsu störf. Frá 1993 starfaði ég í Fríhöfninni í Leifsstöð. Haustið 1999 fékk ég starf sem verslunarstjóri hjá Matbæ á Húsavík. 2 árum síðar sameinuðust Matbær og Samkaup og var ég þá orðinn starfsmaður Samkaupa úr mínum gamla heimabæ. Vorið 2006 var mér boðinn flutningur í starfi og boðið að taka við verslunarstjórastöðu í Borgarnesi sem ég þáði. Þar starfaði ég í 2 ár og flutti þá suður í Reykjanesbæ og starfa nú í Samkaup úrval í Njarðvík sem verslunarstjóri.  Ég held að ég hafi þetta ekki lengra að sinni, kannski bæti ég einhverju við síðar.